Juliana ta representadó di karakter di pueblo pa ekselensia i no meramente un deklamadó di poesia. E ta krea potrèt bibu di tipo i situashonnan verídiko, konbèrtiendo e mes den tipo i situashon. Tur sentido ta aktivo, tin mímika, kanto, paso, zonidu. Su monólogo ta para rosea pa via dje forsa realístiko. Su preferensha ta pa figuranan salí di pueblo: bromadó, buraché, polítiko, mucha, presentá ku tantu kredibilidat artístiko pa e talento Juliana ku no tin preparashon di akademia di arte, sí su don di opservá i ekspresá ku a hasié kreadó di su propio akademia di arte. Juliana no konosé na Kòrsou su igual ainda riba tereno di arte eséniko, tambe pasobra e no mester ni dekorashon, ni esenario elaborá, ni niun medio di yudansa pa lanta un obra monumental pa su oudiensia.

“Loke tabatin mas influensha riba mi tabata ritmo. E patu tabata e promé poema rítmiko ku mi a traha. Kontenido di E patu tabata simpel. Ta e ritmo tabata bisa algu. Mi tabatin un kolekshon di disko afrikano ku e ritmo ta bisa bo algu. Bo no ta komprondé loke nan ta bisa, kanta (...).
Mi tabata pensa ku ta mi mes ta’ tur kos pareu: tantu e tambú, komo e letra. Ku si mi mester a deklamá (...) ku bèkgrount ku tambú, ya ta algu ménos si mi mester di algu pa presentá loke mi tin. Si bo trese un obra literario ku su ritmo, e mes ta tur kos kaba.”
(Rosario-Juliana 1985).

Talbes esaki ta e deklarashon ku mas ku tur otro ta duna testimonio ken ta Elis Juliana. E ta tur kos huntu. E forsa, konfiansa propio i karakterisashon ku ta sali for dje testimonio akí ta resumí e dies terenonan di arte i siensia julianesko. E ta kompletu: análisis i síntesis.
Pa Juliana, bon mirá, ritmo ta dominá asina tantu, ku tin ora nifikashon di palabra no ta importante mes. Hopi artista dje ramo akí a inspirá nan mes riba Juliana i ta rekonosé Juliana komo nan inspiradó mayó. Entre Juliana su poesianan rítmiko mas sélebre tin, aparte dje klásiko E patu, skirbí pa mucha, Bekita, Laba pena, Kanta kueru. E dos últimonan akí ta di masha poko letra, ma nan ta kargá di forsa pa via di nan ritmo hopi fuerte.